midi.is

Sadly this information does not exist in your language.

Kór Langholtskirkju flytur Messías eftir Handel í Langholtskirkju sunnudaginn 20. maí kl. 20. Kammersveit Langholtskirkju leikur með og einsöngvarar eru allir úr röðum kórfélaga. Konsertmeistari er Ari Þór Vilhjálmsson og stjórnandi Jón Stefánsson.

Kórinn flutti verkið fyrst 1981 en þetta verður í tuttugusta og fjórða skiptið sem kórinn syngur verkið á tónleikum. Síðast var verkið flutt á fimmtíu ára afmæli kórsins ásamt Sinfóníuhljómsveit Íslands og voru þá kórfélagar 126 en mjög margir eldri félagar sungu þá með. Í þetta sinn eru kórfélagar þrjátíu og tveir, átta í hverri rödd. Eftir skipulagsbreytingar haustið 2008 var fækkað í kórnum og kröfur um kunnáttu stórhertar. Síðan hefur það verið stefna að kórfélagar syngi öll einsöngshlutverk. Á tónleikunum syngja tíu kórfélagar einsöng en þeir eru allir komnir langt í söngnámi.

Messías er eitt mesta kórverk tónbókmenntanna og sennilega er ekkert verk flutt jafn oft. Handel samdi það á þrem vikum árið 1741 og haft var eftir honum að þegar hann hafi lokið við Hallelújalórinn hafi hann verið yfirkominn af geðshræringu.

Verkið skiptist í þrjá hluta.
I Spádómur um komu Krists, heimsókn englanna til fjárhirðanna og fæðingin.
II Þjáning, krossfesting og sigur yfir dauðanum með Hallelújakórinn sem hápunkt.
III Upprisan, Ég veit að lausnari minn lifir, fyrirheitið um eilíft líf og lofgjörð Opinberunarbókarinnar Honum sé lofgjörðin og heiðurinn og dýrðin og krafturinn um aldir alda. Amen.