midi.is

Nemendamótsnefnd Verzlunarskólans setur upp söngleikinn Thriller í Loftkastalanum. Um er að ræða nýjan íslenskan söngleik sem er byggður upp í kringum lög poppgoðsins Michael Jackson.

Sagan er ný og handritið eftir Ívar Örn Sverrisson sem jafnframt leikstýrir. Í söngleiknum koma fyrir lög frá Jackson 5 tímabilinu og svo af hinum ýmsu plötum Michael Jacksons. Lög eins og The Man In The Mirror, BAD, Beat It, Ben, ABC, Black or White og I´ll Be There eru þar á lista auk fjölda annarra. Sterkur hópur söngvara, leikara og dansara úr Verzlunarskóla Íslands flytja söngleikinn en hann verður frumsýndur 4. febrúar næstkomandi í Loftkastalanum.

Tónlistarstjóri er Jón Ólafsson. Danshöfundur er Stella Rósinkranz. Nemendur sem stíga á svið sem leikarar og dansarar eru 40 talsins og baksviðsnefndir sem sjá um hönnun leikmyndar og búninga, förðun, leikmyndasmíð, markaðsmál o.fl. telja um 100 manns.

Sagan gerist í litlum bæ á ónefndum stað. Strákurinn Jackson kemur nýr í bæinn og virðist ekki vera eins og fólk er flest. Yfirnáttúrulegir hlutir fara að gerast og skólakrakkarnir vita ekki hvernig þau eiga að taka honum. Þetta er saga um ást, söknuð, vináttu og horfna drauma sem rætast á ný.