midi.is

Steini Pési og Gaur á Trommu

Pétur Jóhann Sigfússon og Þorsteinn Guðmundsson sem löngu eru orðnir landsþekktir fyrir sjónvarpsþætti sína og kvikmyndir slá nú saman í uppistandsveislu í Gamla bíói. Með þeim verður tónlistarmaðurinn Helgi Svavar Helgason sem mun halda taktinum gangandi á milli atriða og lífga upp á sýninguna með þokka sínum og persónutöfrum. Pétur og Þorsteinn hafa áður verið með uppistand saman. Fyrst komu þeir fram í Loftkastalanum fyrir 10 árum síðan og í framhaldi af því hafa þeir skemmt Íslendingum um land allt, bæði saman og hvor í sínu lagi. Uppistand þeirra fjallar um allt sem er fyndið, hvort sem það er kjánalegt, bjánalegt, ofurgáfulegt eða einfaldlega skemmtilegt. 

Sýningin í Gamla bíói er uppistand í sinni einföldustu mynd og hentar öllum aldurshópum (nema ungum börnum). Hún er ætluð báðum kynjum, hópum og einmana lúðum, fólki utan af landi eða úr fjölbýlishúsi í borg og jafnvel karlmönnum sem ólust upp hjá einsæðri móður. Að hlæja innilega saman er takmark og tilgangur uppistandsins.