midi.is

Ævintýri Múnkhásens snúa aftur á sviðið hjá Gaflaraleikhúsinu. Sýningin  hlaut einróma lof gagnrýnenda og frábærar viðtökur hjá áhorfendum síðastliðinn vetur.

****„Besta fjölskyldusýningin á höfuðborgarsvæðinu“ JVJ DV
**** „Ævintýrin gerast enn“ EB Fréttablaðið
„Hápunkturinn á óvenju viðburðaríkum leikhúsvetri“ Auður Aðalsteinsdóttir, Spássían     

Aðstandendur sýningarinnar eiga að baki fjölþætta reynslu úr leikhúsi, sjónvarpi, kvikmyndum og tónlist. Sævar Sigurgeirsson skrifar handritið og Ágústa Skúladóttir leikstýrir. Ágústa leikstýrði í fyrra hinni stórglæsilegu opnunarsýningu Hörpunnar á Töfraflautunni og frumsýndi nú í byrjun september nýja uppfærslu af Dýrunum í Hálsaskógi í Þjóðleikhúsinu.

Sævar er jafnframt einn af höfundum þriggja síðustu Áramótaskaupa RÚV, en leikstjóri þeirra, Gunnar Björn Guðmundsson stígur nú á leiksvið aftur eftir nokkurt hlé. Með honum á sviðinu verða stórleikarinn, sjónvarpsstjarnan, barnaefnismaskínan og veiðiklóin Gunnar Helgason, sem vart þarf að kynna; Ágústa Eva Erlendsdóttir, sem slegið hefur í gegn í kvikmyndum á borð við Mýrina og Borgríki, Áramótaskaupinu 2010 og sem söngstirnið og ólíkindatólið Sylvía Nótt og Magnús Guðmundsson sem meðal annars hlaut Grímutilefningu fyrir leik sinn í Fool 4 love hjá Silfurtunglinu 2008.

Tónlistina semja Ármann Guðmundsson, Eggert Hilmarsson og Þorgeir Tryggvason, en þeir eru allir meðlimir í Ljótu hálfvitunum (ásamt Sævari) og leikmynd gerir Axel Hallkell Jóhannesson, en hann á að baki langan og farsælan feril sem leikmyndahönnuður hjá Þjóðleikhúsinu, Borgarleikhúsinu, Íslensku óperunni og víðar.

Ævintýri Múnkhásens er alveg lygilega skemmtileg fjölskyldusýning fyrir alla frá 5 ára aldri um hin ótrúlega lygalaup Múnkhásen, sem átti m. a.  að hafa setið á fljúgandi fallbyssukúlum, ferðast til tunglsins upp baunagras,og bjargast úr díki með því að draga sjálfan sig upp úr á hárinu.Þetta er lygileg sýning fyrir alla aldurshópa, full af ólíkindum, glensi og töfrum leikhússins.