midi.is

Einnar nætur gaman ... ár eftir ár eftir ár

Eitt febrúarkvöld árið 1951 hittast George og Doris fyrir tilviljun á hóteli og verja nóttinni saman. Þetta kvöld kviknar neistinn. Stundum þarf ekki nema eina nótt - en stundum er ein nótt ekki nóg. Því endurtekur sagan sig, ár eftir ár eftir ár. Á þessum árvissu fundum finnum við fyrir umróti sögunnar; kvenfrelsisbaráttunni, hippatímanum, Víetnamstríðinu og því hvernig viðhorf þeirra til lífsins breytast. Og lokauppgjörið nálgast! Verkið sló rækilega í gegn þegar það var frumflutt í New York árið 1975. Það fór sem eldur í sinu um heimsbyggðina og stuttu síðar var gerð kvikmynd sem sömuleiðis naut mikilla vinsælda, hlaut fjölda verðlauna og var m.a. tilnefnd til fernra Óskarsverðlauna. Leikritið var tilnefnt til Tony verðlauna og hlaut Drama Desk verðlaunin sem besta leikrit ársins. Margrét Guðmundsdóttir og Bessi Bjarnason áttu ógleymanlegan leik þegar verkið var sýnt í Þjóðleikhúsinu árið 1978. Tveimur áratugum síðar, árið 1996, léku þau Tinna Gunnlaugsdóttir og Sigurður Sigurjónsson sama leikinn. Nú eru það svo Guðjón Davíð Karlsson og Nína Dögg Filippusdóttir sem takast á við þessi skemmtilegu hlutverk.