Þúsund ára þögn

Um viðburðinn

Þúsund ára þögn. 

Nýtt verk eftir leikhópinn Sóma þjóðar (Hilmi Jensson, Karl Ágúst Þorbergsson, Kolbein Arnbjörnsson og Tryggva Gunnarsson).

„Þetta er bara eins og að horfa inn í garðslöngu og sjá spírallinn og...og þá verður allt einhvern veginn...maður er bara...þetta er eins og í fjallgöngu og þar er lyng og mosi og stein og...og steinninn, hann lifir manninn...“

Í verkinu Þúsund ára þögn takast Hilmir Jensson, Karl Ágúst Þorbergsson, Kolbeinn Arnbjörnsson og Tryggvi Gunnarsson á við birtingarmyndir og áhrif hinnar íslensku þagnar á sálarlíf þjóðarinnar. 

Í vinnuferlinu hafa þeir lagt áherslu á að kanna þögnina út frá tilfinningalegri þöggun og bælingu og einnig skoðað hvaðan hugmyndin um þögn sem dyggð kemur. 

Hvað veldur því að við flýjum inn í þögnina í stað þess að takast á við erfiðar tilfinningar og vandamál? Af hverju virðumst halda að við getum þagað af okkur heilu lífin? Getur verið að við erfum þögn og bældar tilfinningar forfeðra okkar án þess að neitt með það að gera? 

Í samfélagi dagins í dag, þar sem allt á að vera upp á borðum og allir eiga að geta talað um allt alltaf, er sömuleiðis áhugavert að kanna hvort lausn vandamála okkar felist í stanslausum játningum. 

Getur þögnin verið af hinu góða? Þurfum við að komast handan hennar og berjast í gegnum byl og skafla inn á heiðarlönd sjálfs okkar? 

Verkið Þúsund ára þögn er styrkt af Rannsóknarmiðstöð Íslands.

Fyrri sýningar Sóma þjóðar

- Gálma eftir Tryggva Gunnarsson (2011) - Tilnefnt til Grímuverðlauna þetta sama ár.
- PUNCH - ásamt Stick and Stones (2012).
- Ég er vindurinn eftir Jon Fosse (2012).
- MP5 eftir Tryggva Gunnarsson og Hilmi Jensson (2014).
- Björninn eftir William Walton á Cycles Music Festival (2015).
- FótboltaÓperan á Óperudögum í Kópavogi (2016)