Steelheart

Um viðburðinn

Bandaríska "hár-metal" hljómsveitin Steelheart stimplaði sig rækilega inn í tónlistarsöguna í kringum 1990 þegar hún gaf frá sér frumburð sinn Steelheart sem rokseldist um heim allan. Ofurballaðan "She’s Gone", sem sýnir hið nánast ofurmannlega raddsvið söngvarans Miljenko "Mili" Matijevic skaust í fyrsta sætið á vinsældarlistum útum allan heim og tórði þar í 17 vikur. Smáskífan "I’ll Never Let You Go" sem fylgdi í kjölfarið náði einnig gríðarlegum vinsældum og var annað mest umbeðna lagið á MTV á þeim tíma. Önnur lög eins og "Can’t Stop Me From Loving You" og "Everybody Loves Eileen" nutu einnig mikilla vinsælda.

1992 kom út hin meira rokkaðari plata "Tangled in Rains" með lög eins og "Sticky Side Up", "Dancing in the Fire", "Steelheart" og hina gullfallegu ballöðu "Mama Don’t You Cry". Platan Wait kom svo út 1996 en var ekki eins vel tekið enda rokktónlistarlandslagið mikið breytt með allsherjarinnreið gruggsins nokkrum árum áður.

En, tímar breytast og 2001 var Mili fenginn til að syngja fyrir leikarann Mark Wahlberg í bandarísku myndinni “Rock Star”. Tónlist hljómsveitarinnar sem myndin er um, Steel Dragon, hitti alveg í mark, meðal annars með lagi Steelheart “We All Die Young”, sem kom út á “Wait” fimm árum áður, svo og laginu “Stand Up And Shout”.

Þrátt fyrir þennan meðbyr þurftu aðdáendur sveitarinnar þó að bíða til 2008 eftir nýrri breiðskífu þegar hin Led Zeppelin innblásna plata Good 2B Alive kom út. Bið rokkþyrstra Íslendinga til þess að sjá bandið spila er þó brátt á enda en sveitin kemur til Íslands á ferðalagi þeirra til Svíþjóðar, þar sem hún mun spila tveimur dögum síðar á stærstu þungarokkshátíð Norðurlandanna Sweden Rock Festival.

VIP miðar (UPPSELDIR)
Boðið verður uppá sérstaka VIP miða á þessa tónleika. Veita þeir miðahöfum aðgang að sérstöku eftirpartí eða meet and greet, þar sem hægt verður að heilsa upp á hljómsveitarmeðlimi eftir tónleikana, fá hjá þeim eiginhandaráritanir og slíkt. Athugið að einungis 50 slíkir miðar verða í boði og veita þeir að sjálfsögðu einnig aðgang að tónleikunum.

Þrjár íslenskar sveitir hafa verið valdar til að hita upp en þær eru:
Dúndurfréttir, Exizt og Atrum.

Tónleikagestum með gleraugu er vinsamlega bent á að mæta með linsur þar sem Miljenko hefur engum háum nótum tapað. :)

ATH: Uppselt er á tónleikana í forsölu. Miðasala verður við inngang frá kl 19.00 á tónleikadag.

20 ára aldurstakmark.