Jólatónleikar Mótettukórs Hallgrímskirkju

Um viðburðinn

Mótettukór Hallgrímskirkju hefur í rúm þrjátíu ár glatt Íslendinga á jólum og skipa jólatónleikar kórsins veglegan sess í ríkulegu tónleikahaldi í Reykjavík.  

Í ár heldur kórinn þrenna tónleika á aðventunni þar sem hinn hreini kórsöngur skreyttur orgelleik og málmblæstri verður í sviðsljósinu.
Mótettukórsfélagar munu láta ljós sitt skína í ýmsum hlutverkum á tónleikunum og verður orgelleikur á hið mikla Klais-orgel Hallgrímskirkju til að mynda í höndum Lenku Matéova, organista og kórfélaga. Málmblásarar eru úr röðum Sinfoníuhljómsveitar Íslands. Stjórnandi er Hörður Áskelsson.
 
Á efnisskránni er hátíðleg aðventu- og jólatónlist þar sem ofnir eru saman þýskir barokksálmar eftir Praetorius, Gabrieli og Eccard í bland við lúðragjöll og mikilfenglegan orgelhljóm Klaisorgelsins. Auk þess verða fluttir sjaldheyrðir enskir jólasöngvar, nýjar íslenskar jólaperlur og fjöldinn allur af þekktum og hljómfögrum jólasálmum í hátíðlegum búningi.

Haldnir verða þrennir tónleikar í Hallgrímskirkju, laugardaginn 5. desember kl. 17, sunnudaginn 6. desember kl. 17 og þriðjudaginn 8.desember kl. 20.